ಬೆಂಗಳೂರು (ಸಂಭ್ರಮಪ್ರಭ ವಾರ್ತೆ): 2027ನೇ ಸಾಲಿನ ಕರ್ನಾಟಕ ಸರ್ಕಾರದ ಸಾರ್ವತ್ರಿಕ ಹಾಗೂ ಪರಿಮಿತ ರಜಾ ದಿನಗಳ ಅಧಿಕೃತ ಪಟ್ಟಿಯನ್ನು ರಾಜ್ಯ ಸರ್ಕಾರ ಶನಿವಾರ (ನವೆಂಬರ್ 21, 2026) ಪ್ರಕಟಿಸಿದೆ. ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆಯ (ರಾಜ್ಯ ಶಿಷ್ಟಾಚಾರ) ಅಧೀನ ಕಾರ್ಯದರ್ಶಿ ರವಿಕುಮಾರ್ ಎಸ್. ಅವರು ರಾಜ್ಯಪಾಲರ ಆಜ್ಞಾನುಸಾರ ಈ ಕುರಿತು ಅಧಿಕೃತ ಅಧಿಸೂಚನೆ ಹೊರಡಿಸಿದ್ದಾರೆ.
ಪ್ರಮುಖಾಂಶಗಳು:
-
2027ನೇ ವರ್ಷಕ್ಕೆ ಒಟ್ಟು 18 ಸಾರ್ವತ್ರಿಕ ರಜಾ ದಿನಗಳು (ಎಲ್ಲಾ ಎರಡನೇ, ನಾಲ್ಕನೇ ಶನಿವಾರ ಮತ್ತು ಭಾನುವಾರಗಳನ್ನು ಹೊರತುಪಡಿಸಿ) ಮಂಜೂರಾಗಿವೆ.
-
ರಾಜ್ಯ ಸರ್ಕಾರಿ ನೌಕರರಿಗೆ 19 ಪರಿಮಿತ ರಜಾ ದಿನಗಳನ್ನು ನಿಗದಿಪಡಿಸಲಾಗಿದ್ದು, ಪೂರ್ವಾನುಮತಿ ಪಡೆದು ಗರಿಷ್ಠ 2 ಪರಿಮಿತ ರಜೆಗಳನ್ನು ಮಾತ್ರ ಬಳಸಿಕೊಳ್ಳಲು ಅವಕಾಶವಿದೆ.
-
ಸ್ವಾತಂತ್ರ್ಯ ದಿನಾಚರಣೆ, ವಿಜಯದಶಮಿ, ಆಯುಧಪೂಜೆ, ಬಸವ ಜಯಂತಿ ಮತ್ತು ಕ್ರಿಸ್ಮಸ್ ಸೇರಿದಂತೆ 7 ಪ್ರಮುಖ ಹಬ್ಬಗಳು ಭಾನುವಾರ ಹಾಗೂ 2ನೇ/4ನೇ ಶನಿವಾರದಂದೇ ಬಂದಿರುವುದರಿಂದ ನೌಕರರಿಗೆ ಪ್ರತ್ಯೇಕ ರಜೆ ಕೈತಪ್ಪಿದೆ.
-
ಕೊಡಗು ಜಿಲ್ಲೆಗೆ ಮಾತ್ರ ಅನ್ವಯವಾಗುವಂತೆ 3 ವಿಶೇಷ ಸ್ಥಳೀಯ ಸಾರ್ವತ್ರಿಕ ರಜೆಗಳನ್ನು ಘೋಷಿಸಲಾಗಿದೆ.
ಭಾನುವಾರ-ಶನಿವಾರವೇ ಬರುವ ಪ್ರಮುಖ ಹಬ್ಬಗಳು: ರಜೆಗೆ ಕತ್ತರಿ!
ಈ ಬಾರಿಯ ರಜಾ ಪಟ್ಟಿಯಲ್ಲಿ ಸರ್ಕಾರಿ ನೌಕರರು ಮತ್ತು ಶಾಲಾ-ಕಾಲೇಜು ವಿದ್ಯಾರ್ಥಿಗಳಿಗೆ ಕೊಂಚ ನಿರಾಸೆಯೂ ಎದುರಾಗಿದೆ. ಹಲವು ದೊಡ್ಡ ಹಬ್ಬಗಳು ವಾರಾಂತ್ಯದ ರಜಾ ದಿನಗಳಂದೇ ಬಂದಿರುವುದರಿಂದ ಅವುಗಳನ್ನು ಸಾರ್ವತ್ರಿಕ ರಜಾ ಪಟ್ಟಿಯಲ್ಲಿ ಪ್ರತ್ಯೇಕವಾಗಿ ನಮೂದಿಸಿಲ್ಲ.
-
ಭಾನುವಾರ ಬರುವ ಹಬ್ಬಗಳು: ಮಹಾವೀರ ಜಯಂತಿ (ಏಪ್ರಿಲ್ 18), ಬಸವೇಶ್ವರ ಜಯಂತಿ (ಮೇ 09), ಸ್ವಾತಂತ್ರ್ಯ ದಿನಾಚರಣೆ ಮತ್ತು ಈದ್-ಮಿಲಾದ್ (ಆಗಸ್ಟ್ 15 – ಒಂದೇ ಭಾನುವಾರ ಎರಡು ಹಬ್ಬಗಳು) ಹಾಗೂ ವಿಜಯ ದಶಮಿ (ಅಕ್ಟೋಬರ್ 10).
-
ಶನಿವಾರ ಬರುವ ಹಬ್ಬಗಳು: ಮಹಾನವಮಿ/ಆಯುಧಪೂಜೆ (ಅಕ್ಟೋಬರ್ 09 – ಎರಡನೇ ಶನಿವಾರ) ಹಾಗೂ ಕ್ರಿಸ್ಮಸ್ (ಡಿಸೆಂಬರ್ 25 – ನಾಲ್ಕನೇ ಶನಿವಾರ).
ಇದಲ್ಲದೆ, ಪರಿಮಿತ ರಜಾ ಪಟ್ಟಿಯಲ್ಲೂ ಷಬ್-ಎ-ಬರಾತ್ (ಜ.24), ಷಬ್-ಎ-ಖಾದರ್ (ಮಾ.07), ಹೋಳಿ ಹಬ್ಬ (ಮಾ.21), ದೇವಾಂಗ ದಾಸಿಮಯ್ಯ ಜಯಂತಿ (ಏ.11), ತಿರು ಓಣಂ (ಸೆ.12) ಮತ್ತು ಗುರುನಾನಕ್ ಜಯಂತಿ (ನ.14) ಭಾನುವಾರದಂದು ಹಾಗೂ ಪವಿತ್ರ ಶನಿವಾರ (ಮಾ.27) ನಾಲ್ಕನೇ ಶನಿವಾರದಂದು ಬಂದಿರುವುದರಿಂದ ಪಟ್ಟಿಯಲ್ಲಿ ಸೇರಿಸಲಾಗಿಲ್ಲ.
ದೀಪಾವಳಿಗೆ 5 ದಿನಗಳ ಬಂಪರ್ ರಜೆ: ಲಾಂಗ್ ವೀಕೆಂಡ್ ಲೆಕ್ಕಾಚಾರ!
ಹಲವು ರಜೆಗಳು ಭಾನುವಾರ ಬಂದಿದ್ದರೂ, 2027ರಲ್ಲಿ ಪ್ರವಾಸಕ್ಕೆ ಯೋಜನೆ ರೂಪಿಸುವವರಿಗೆ ಕೆಲವು ಉತ್ತಮ ‘ಲಾಂಗ್ ವೀಕೆಂಡ್’ ಅವಕಾಶಗಳಿವೆ. ವಿಶೇಷವಾಗಿ ಅಕ್ಟೋಬರ್ ಕೊನೆಯಲ್ಲಿ ಗುರುವಾರ (ಅ.28) ನರಕ ಚತುರ್ದಶಿ, ಶನಿವಾರ (ಅ.30) ದೀಪಾವಳಿ, ಭಾನುವಾರ (ಅ.31) ಹಾಗೂ ಸೋಮವಾರ (ನ.01) ಕನ್ನಡ ರಾಜ್ಯೋತ್ಸವ ರಜೆಗಳಿವೆ. ಮಧ್ಯೆ ಬರುವ ಶುಕ್ರವಾರ (ಅ.29) ಒಂದು ದಿನ ರಜೆ ಹಾಕಿದರೆ ಬರೋಬ್ಬರಿ 5 ದಿನಗಳ ಸಾಲು ರಜೆ ಸಿಗಲಿದೆ. ಇದರೊಂದಿಗೆ ಗುಡ್ ಫ್ರೈಡೇ (ಮಾ.26 ಶುಕ್ರವಾರ), ಬಕ್ರೀದ್ (ಮೇ 17 ಸೋಮವಾರ) ಮತ್ತು ವಾಲ್ಮೀಕಿ ಜಯಂತಿ (ಅ.15 ಶುಕ್ರವಾರ) ವಾರಾಂತ್ಯಕ್ಕೆ ಹೊಂದಿಕೊಂಡೇ ಬಂದಿವೆ.
| ಕ್ರಮ ಸಂಖ್ಯೆ | ದಿನಾಂಕ | ವಾರಗಳು | ಸಾರ್ವತ್ರಿಕ ರಜಾ ದಿನಗಳು |
|---|---|---|---|
| 1 | 15.01.2027 | ಶುಕ್ರವಾರ | ಮಕರ ಸಂಕ್ರಾಂತಿ / ಉತ್ತರಾಯಣ ಪುಣ್ಯಕಾಲ |
| 2 | 26.01.2027 | ಮಂಗಳವಾರ | ಗಣರಾಜ್ಯೋತ್ಸವ ದಿನ |
| 3 | 06.03.2027 | ಶನಿವಾರ | ಮಹಾ ಶಿವರಾತ್ರಿ |
| 4 | 10.03.2027 | ಬುಧವಾರ | ಖುತುಬ್-ಎ-ರಂಜಾನ್ |
| 5 | 26.03.2027 | ಶುಕ್ರವಾರ | ಗುಡ್ ಫ್ರೈಡೇ |
| 6 | 07.04.2027 | ಬುಧವಾರ | ಚಾಂದ್ರಮಾನ ಯುಗಾದಿ |
| 7 | 14.04.2027 | ಬುಧವಾರ | ಡಾ|| ಬಿ. ಆರ್. ಅಂಬೇಡ್ಕರ್ ಜಯಂತಿ |
| 8 | 01.05.2027 | ಶನಿವಾರ | ಕಾರ್ಮಿಕ ದಿನಾಚರಣೆ |
| 9 | 17.05.2027 | ಸೋಮವಾರ | ಬಕ್ರೀದ್ |
| 10 | 16.06.2027 | ಬುಧವಾರ | ಮೊಹರಂ ಕಡೆ ದಿನ |
| 11 | 04.09.2027 | ಶನಿವಾರ | ವರಸಿದ್ಧಿ ವಿನಾಯಕ ವ್ರತ |
| 12 | 29.09.2027 | ಬುಧವಾರ | ಮಹಾಲಯ ಅಮಾವಾಸ್ಯೆ |
| 13 | 02.10.2027 | ಶನಿವಾರ | ಗಾಂಧಿ ಜಯಂತಿ |
| 14 | 15.10.2027 | ಶುಕ್ರವಾರ | ವಾಲ್ಮೀಕಿ ಜಯಂತಿ |
| 15 | 28.10.2027 | ಗುರುವಾರ | ನರಕ ಚತುರ್ದಶಿ |
| 16 | 30.10.2027 | ಶನಿವಾರ | ದೀಪಾವಳಿ |
| 17 | 01.11.2027 | ಸೋಮವಾರ | ಕನ್ನಡ ರಾಜ್ಯೋತ್ಸವ |
| 18 | 16.11.2027 | ಮಂಗಳವಾರ | ಕನಕದಾಸ ಜಯಂತಿ |
| ಕ್ರಮ ಸಂಖ್ಯೆ | ದಿನಾಂಕ | ವಾರಗಳು | ಪರಿಮಿತ ರಜಾ ದಿನಗಳು |
|---|---|---|---|
| 1 | 01.01.2027 | ಶುಕ್ರವಾರ | ನೂತನ ವರ್ಷಾರಂಭ |
| 2 | 15.02.2027 | ಸೋಮವಾರ | ಮಧ್ವ ನವಮಿ |
| 3 | 05.03.2027 | ಶುಕ್ರವಾರ | ಜುಮತ್-ಉಲ್-ವೀದ |
| 4 | 15.04.2027 | ಗುರುವಾರ | ಶ್ರೀರಾಮನವಮಿ |
| 5 | 10.05.2027 | ಸೋಮವಾರ | ಶ್ರೀ ರಾಮಾನುಜಾಚಾರ್ಯ ಜಯಂತಿ |
| 6 | 11.05.2027 | ಮಂಗಳವಾರ | ಶ್ರೀ ಶಂಕರಾಚಾರ್ಯ ಜಯಂತಿ |
| 7 | 20.05.2027 | ಗುರುವಾರ | ಬುದ್ಧಪೂರ್ಣಿಮ |
| 8 | 13.08.2027 | ಶುಕ್ರವಾರ | ಶ್ರೀ ವರಮಹಾಲಕ್ಷ್ಮಿ ವ್ರತ |
| 9 | 16.08.2027 | ಸೋಮವಾರ | ಋಗ್ ಉಪಕರ್ಮ |
| 10 | 17.08.2027 | ಮಂಗಳವಾರ | ಯಜುರ್ ಉಪಕರ್ಮ |
| 11 | 24.08.2027 | ಮಂಗಳವಾರ | ಶ್ರೀ ಕೃಷ್ಣ ಜನ್ಮಾಷ್ಟಮಿ |
| 12 | 03.09.2027 | ಶುಕ್ರವಾರ | ಸ್ವರ್ಣಗೌರಿ ವ್ರತ |
| 13 | 08.09.2027 | ಬುಧವಾರ | ಕನ್ಯಾ ಮರಿಯಮ್ಮ ಜಯಂತಿ |
| 14 | 14.09.2027 | ಮಂಗಳವಾರ | ಅನಂತಪದ್ಮನಾಭ ವ್ರತ |
| 15 | 15.09.2027 | ಬುಧವಾರ | ಶ್ರೀ ಬ್ರಹ್ಮರ್ಷಿ ನಾರಾಯಣ ಗುರೂಜಿ ಜಯಂತಿ |
| 16 | 17.09.2027 | ಶುಕ್ರವಾರ | ವಿಶ್ವಕರ್ಮ ಜಯಂತಿ |
| 17 | 18.10.2027 | ಸೋಮವಾರ | ತುಲಾ ಸಂಕ್ರಮಣ ಪುಣ್ಯ ಕಾಲ |
| 18 | 13.12.2027 | ಸೋಮವಾರ | ಹುತ್ತರಿ ಹಬ್ಬ |
| 19 | 24.12.2027 | ಶುಕ್ರವಾರ | ಕ್ರಿಸ್ಮಸ್ ಈವ್ |
ಕೊಡಗು ಜಿಲ್ಲೆಗೆ ವಿಶೇಷ ರಜೆ ಹಾಗೂ ಸರ್ಕಾರದ ಇತರೆ ಸೂಚನೆಗಳು:
-
ಕೊಡಗು ಜಿಲ್ಲೆಗೆ 3 ಸ್ಥಳೀಯ ಸಾರ್ವತ್ರಿಕ ರಜೆ: ಕೈಲ್ ಮೂಹೂರ್ತ (03.09.2027 – ಶುಕ್ರವಾರ), ತುಲಾ ಸಂಕ್ರಮಣ (18.10.2027 – ಸೋಮವಾರ) ಮತ್ತು ಹುತ್ತರಿ ಹಬ್ಬ (13.12.2027 – ಸೋಮವಾರ) ಆಚರಿಸಲು ಕೊಡಗು ಜಿಲ್ಲೆಗೆ ಮಾತ್ರ ಅನ್ವಯವಾಗುವಂತೆ ಸ್ಥಳೀಯ ಸಾರ್ವತ್ರಿಕ ರಜೆಯನ್ನು ಘೋಷಿಸಲಾಗಿದೆ.
-
ಶಾಲಾ-ಕಾಲೇಜು ರಜೆಗಳು: ಶಿಕ್ಷಣ ಇಲಾಖೆಗೆ ಸಂಬಂಧಿಸಿದ ರಜೆಗಳಿಗೆ ಅನ್ವಯಿಸುವಂತೆ ಸಾರ್ವಜನಿಕ ಶಿಕ್ಷಣ ಇಲಾಖೆಯ ಆಯುಕ್ತರು ಪ್ರತ್ಯೇಕ ರಜಾ ದಿನಗಳ ಪಟ್ಟಿಯನ್ನು ಪ್ರಕಟಿಸಲಿದ್ದಾರೆ.
-
ಮುಸಲ್ಮಾನ ಬಾಂಧವರ ಹಬ್ಬಗಳು: ಪಟ್ಟಿಯಲ್ಲಿರುವ ಮುಸಲ್ಮಾನ ಬಾಂಧವರ ಹಬ್ಬಗಳು ಚಂದ್ರದರ್ಶನದ ಆಧಾರದ ಮೇಲೆ ನಿಗದಿತ ದಿನಾಂಕದಂದು ಬೀಳದಿದ್ದರೆ, ಸರ್ಕಾರಿ ಸೇವೆಯಲ್ಲಿರುವ ಮುಸಲ್ಮಾನ ಬಾಂಧವರಿಗೆ ನಿಗದಿತ ರಜೆಗೆ ಬದಲಾಗಿ ಹಬ್ಬದ ದಿನದಂದೇ ರಜೆ ಮಂಜೂರು ಮಾಡಲು ಅವಕಾಶ ನೀಡಲಾಗಿದೆ.
