ವರದಿ: ಪ್ರಿಯಾಂಕಾ ಚಂದ್ರಶೇಖರ್ ಗಂಧನಹಳ್ಳಿ
ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಇಟಲಿ ರಾಜಧಾನಿ ರೋಮ್ ನಲ್ಲಿದ್ದಾರೆ. ಅಲ್ಲಿ ಅವರು ಇಟಲಿ ಪ್ರಧಾನ ಮಂತ್ರಿ ಜಾರ್ಜಿಯಾ ಮೆಲೋನಿ ಅವರನ್ನು ಭೇಟಿ ಮಾಡಿ ಸಹಭೋಜನ ಸವಿದು ‘Melody’ ಚಾಕಲೇಟ್ ಗಳನ್ನು ತುಂಬಿದ ಪ್ಯಾಕೇಟ್ ನ್ನು ಉಡುಗೊರೆಯಾಗಿ ನೀಡಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.“#Melodi” ಎಂಬ ಹ್ಯಾಶ್ ಟಾಗ್ ನಲ್ಲಿ ಕಮೆಂಟ್ ಗಳ ಸುರಿಮಳೆಯೇ ಹರಿಯುತ್ತಿದೆ.
ಇಟಲಿ ಪ್ರವಾಸದಲ್ಲಿರುವ ಮೋದಿ ಅವರ ಭೇಟಿಯ ವೇಳೆ ಆನ್ಲೈನ್ನಲ್ಲಿ ಹಂಚಿಕೊಳ್ಳಲಾದ ಹಗುರ ಮನರಂಜನಾತ್ಮಕ ವಿಡಿಯೋದಲ್ಲಿ, ನೀಲಿ ಬಣ್ಣದ ಬಂಧ್ಗಲಾ ಉಡುಪಿನಲ್ಲಿ ಕಾಣಿಸಿಕೊಂಡ ಮೋದಿ ಅವರು, ಬಿಳಿ ಬಣ್ಣದ ಸೂಟ್ ಧರಿಸಿದ್ದ ಮೆಲೋನಿ ಅವರಿಗೆ ಪ್ರಸಿದ್ಧ Melody ಟಾಫಿಗಳ ಚೀಲವನ್ನು ನೀಡುತ್ತಿರುವುದು ಕಾಣಿಸಿದ್ದು, ಇಬ್ಬರೂ ನಗುತ್ತಾ ಹಾಸ್ಯಮಯ ಕ್ಷಣವನ್ನು ಹಂಚಿಕೊಂಡಿದ್ದಾರೆ.
ಈ ವಿಡಿಯೋವನ್ನು X ನಲ್ಲಿ ಹಂಚಿಕೊಂಡ ಮೆಲೋನಿ, “ಉಡುಗೊರೆಗೆ ಧನ್ಯವಾದಗಳು ಮೋದಿಯವರೇ” ಎಂದು ಬರೆದಿದ್ದಾರೆ. ವಿಡಿಯೋ ಪೋಸ್ಟ್ ಆದ ಕೆಲವೇ ಸಮಯದಲ್ಲಿ ಅದು ವೈರಲ್ ಆಗಿ, ಒಂದು ಗಂಟೆಯೊಳಗೆ ಸುಮಾರು 10 ಲಕ್ಷ ವೀಕ್ಷಣೆಗಳು, 60 ಸಾವಿರಕ್ಕೂ ಹೆಚ್ಚು ಪ್ರತಿಕ್ರಿಯೆಗಳು ಹಾಗೂ ಸುಮಾರು 5 ಸಾವಿರ ಕಾಮೆಂಟ್ಗಳನ್ನು ಪಡೆದುಕೊಂಡಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಈ ಕ್ಷಣ “ಅತ್ಯಂತ ದೊಡ್ಡ #Melodi ಕ್ರಾಸ್ಓವರ್” ಎಂದು ಬಳಕೆದಾರರು ವರ್ಣಿಸಿದ್ದಾರೆ. X ಹಾಗೂ Instagramನಲ್ಲಿ ಸ್ಕ್ರೀನ್ಶಾಟ್ಗಳು, ಮೀಮ್ಸ್ ಮತ್ತು ಎಡಿಟ್ ಮಾಡಿದ ವಿಡಿಯೋಗಳು ಹರಿದಾಡಿದವು. ಅನೇಕರು ರಾಜಕೀಯ ಮೀಮ್ಸ್ಗಳ ಬಗ್ಗೆ ಮೋದಿ ಅವರಿಗೆ ಇರುವ ಅರಿವನ್ನು ಪ್ರಶಂಸಿಸಿದರು.
