ಹನೂರು (ಚಾಮರಾಜನಗರ): ಕಾವೇರಿ ವನ್ಯಜೀವಿ ಅಭಯಾರಣ್ಯ ವ್ಯಾಪ್ತಿಯ ಚಿಕ್ಕಲ್ಲೂರು ಮೀಸಲು ಅರಣ್ಯದಲ್ಲಿ ಇತ್ತೀಚೆಗೆ ಅರಣ್ಯ ಇಲಾಖೆ ಸಿಬ್ಬಂದಿಯಿಂದ (ಎನ್ಕೌಂಟರ್) ಹತರಾದ ಮೂವರು ಶಂಕಿತ ಬೇಟೆಗಾರರ ಪ್ರಕರಣ ಇದೀಗ ಭಾರಿ ಸ್ವರೂಪ ಪಡೆದುಕೊಂಡಿದೆ. ಸಿಬ್ಬಂದಿ ‘ಸ್ವರಕ್ಷಣೆ’ಗಾಗಿ ಗುಂಡು ಹಾರಿಸಿದ್ದಾರೆ ಎಂದು ಅರಣ್ಯ ಸಚಿವ ರಾಮಲಿಂಗಾರೆಡ್ಡಿ ಅವರು ವಿಧಾನಸಭೆಯಲ್ಲಿ ಸಮರ್ಥಿಸಿಕೊಂಡಿದ್ದರು. ಆದರೆ, ಇದೀಗ ಹೊರಬಿದ್ದಿರುವ ಮರಣೋತ್ತರ ಪರೀಕ್ಷೆಯ (Autopsy) ಪ್ರಾಥಮಿಕ ವರದಿಗಳು ಅರಣ್ಯ ಇಲಾಖೆಯ ವಾದವನ್ನು ಬುಡಮೇಲು ಮಾಡಿವೆ.
ಮೃತರ ದೇಹದ ಮೇಲಿದ್ದ ಗುಂಡಿನ ಗಾಯಗಳನ್ನು ಪರಿಶೀಲಿಸಿದಾಗ, ಇದು ದೂರದಿಂದ ಸ್ವರಕ್ಷಣೆಗಾಗಿ ಹಾರಿಸಿದ ಗುಂಡೇಟುಗಳಲ್ಲ, ಬದಲಾಗಿ ಕೇವಲ ಒಂದು ಅಥವಾ ಎರಡು ಅಡಿಗಳಷ್ಟು ಅತೀ ಸಮೀಪದಿಂದ (Point-blank range) ಶೂಟ್ ಮಾಡಲಾಗಿದೆ ಎಂಬ ಆಘಾತಕಾರಿ ಅಂಶ ಫೋರೆನ್ಸಿಕ್ ತಜ್ಞರ ವಿಶ್ಲೇಷಣೆಯಿಂದ ಬಹಿರಂಗವಾಗಿದೆ.
ಏನಿದು ಘಟನೆ?: ಆಗಸ್ಟ್ 15 ರ ಮುಂಜಾನೆ ಹನೂರು ತಾಲೂಕಿನ ಚಿಕ್ಕಲ್ಲೂರು ಅರಣ್ಯದ ಕರಡಿಕಲ್ ಪ್ರದೇಶದಲ್ಲಿ ಆಂಥೋನಿ ಸ್ವಾಮಿ, ಜಾನ್ ರೋಸ್ ಪೀಟರ್ ಮತ್ತು ಸೆಬಾಸ್ಟಿಯನ್ ಡೇವಿಡ್ ಕುಮಾರ್ ಎಂಬುವವರನ್ನು ಅರಣ್ಯಾಧಿಕಾರಿಗಳು ಗುಂಡಿಕ್ಕಿ ಕೊಂದಿದ್ದರು. ಪರವಾನಗಿ ಇಲ್ಲದ ನಾಡಮುದ್ದಿನ ಕೋವಿಗಳೊಂದಿಗೆ ಬೇಟೆಗಾರರು ಬಂದಿದ್ದಾರೆ ಎಂಬ ಖಚಿತ ಮಾಹಿತಿ ಮೇರೆಗೆ ದಾಳಿ ನಡೆಸಿದ್ದೆವು. ಶರಣಾಗುವಂತೆ ಸೂಚಿಸಿದರೂ ಕೇಳದೆ ನಮ್ಮ ಮೇಲೆಯೇ ದಾಳಿಗೆ ಮುಂದಾದಾಗ ‘ಸ್ವರಕ್ಷಣೆ’ಗಾಗಿ ಗುಂಡು ಹಾರಿಸಿದೆವು ಎಂಬುದು ಕಾವೇರಿ ವನ್ಯಜೀವಿ ವಿಭಾಗದ ಡಿಸಿಎಫ್ ನೀಡಿದ್ದ ವರದಿಯಲ್ಲಿತ್ತು.
ಆದರೆ, ಈ ದಾಳಿಯಿಂದ ಪ್ರಾಣಾಪಾಯದಿಂದ ಪಾರಾಗಿ ಓಡಿಹೋಗಿದ್ದ ನಾಲ್ಕನೇ ವ್ಯಕ್ತಿ ಜೋಸೆಫ್ ಮಹಿಮಾ ದಾಸ್ ಎಂಬಾತ, “ಮುಂಜಾನೆ 5.30ರ ಸುಮಾರಿಗೆ ಬಂದ ಅಧಿಕಾರಿಗಳು ಏಕಾಏಕಿ ಗುಂಡು ಹಾರಿಸಲು ಶುರು ಮಾಡಿದರು,” ಎಂದು ವಿಡಿಯೋ ಮೂಲಕ ಆರೋಪಿಸಿದ್ದ. ಸದ್ಯ ಈ ಪ್ರಕರಣದ ತನಿಖೆಯನ್ನು ಸಿಐಡಿ (CID) ತನಿಖೆಗೆ ವಹಿಸಲಾಗಿದೆ.
ಮರಣೋತ್ತರ ಪರೀಕ್ಷೆ ಬಿಚ್ಚಿಟ್ಟ ರಹಸ್ಯಗಳೇನು?
ಈ ಪ್ರಕರಣದಲ್ಲಿ ಬಳಸಲಾದ ‘ಶಾಟ್ಗನ್’ (Shotgun) ಮತ್ತು ಮೃತರ ದೇಹದಲ್ಲಿ ಪತ್ತೆಯಾಗಿರುವ ಗಾಯಗಳು ಅರಣ್ಯ ಇಲಾಖೆಯ ಕಥೆಗೆ ತಾಳೆಯಾಗುತ್ತಿಲ್ಲ. ಫೋರೆನ್ಸಿಕ್ ತಜ್ಞರೊಬ್ಬರು ಈ ವರದಿಗಳನ್ನು ವಿಶ್ಲೇಷಿಸಿದ್ದು, ಹತ್ತಿರದಿಂದ ಗುಂಡು ಹಾರಿಸಿರುವುದಕ್ಕೆ ಬಲವಾದ ಸಾಕ್ಷ್ಯಗಳನ್ನು ಬಿಚ್ಚಿಟ್ಟಿದ್ದಾರೆ.
-
ನಾಲ್ಕು ಗುಂಡೇಟುಗಳು: ಮೃತರಾದ ಮೂವರ ದೇಹದಲ್ಲಿ ಒಟ್ಟು ನಾಲ್ಕು ಪ್ರಮುಖ ಗುಂಡಿನ ಗಾಯಗಳಿವೆ. ಸೆಬಾಸ್ಟಿಯನ್ ಮತ್ತು ಆಂಥೋನಿ ದೇಹದ ಮೇಲಿನ ಗಾಯಗಳು ಅತೀ ಸನಿಹದಿಂದ (Close range) ಆದವುಗಳಾಗಿವೆ. ಜಾನ್ ರೋಸ್ ಪೀಟರ್ನ ಕುತ್ತಿಗೆಗೆ ಗುಂಡು ಹೊಕ್ಕಿರುವುದು ಸಿಟಿ ಸ್ಕ್ಯಾನ್ ವರದಿಯಿಂದ ದೃಢಪಟ್ಟಿದೆ.
-
ಮೇಲಿನಿಂದ ಕೆಳಗೆ ಫೈರಿಂಗ್!: 36 ವರ್ಷದ ಸೆಬಾಸ್ಟಿಯನ್ಗೆ ಎರಡು ಗುಂಡುಗಳು ತಗುಲಿವೆ. ಒಂದು ಎಡಭಾಗದ ಎದೆಗೆ, ಮತ್ತೊಂದು ಬಲ ತೊಡೆಗೆ. ಎದೆಗೆ ಹೊಕ್ಕ ಗುಂಡು ಮೇಲಿನಿಂದ ಕೆಳಮುಖವಾಗಿ ಚಲಿಸಿದೆ (ಅಂದರೆ ಶೂಟ್ ಮಾಡಿದವರು ಎತ್ತರದಲ್ಲಿದ್ದರು ಅಥವಾ ಮೃತನನ್ನು ಕೂರಿಸಿ ಶೂಟ್ ಮಾಡಲಾಗಿದೆ). ಇದು ಆತನ ಮೂರು ಪಕ್ಕೆಲುಬುಗಳನ್ನು ಮುರಿದು, ಶ್ವಾಸಕೋಶ ಮತ್ತು ಹೃದಯವನ್ನು ಛಿದ್ರಗೊಳಿಸಿದೆ. ಆದರೆ ತೊಡೆಗೆ ತಗುಲಿದ ಗುಂಡು ಕೆಳಗಿನಿಂದ ಮೇಲಕ್ಕೆ ಚಲಿಸಿದೆ! “ಇದು ಸ್ವರಕ್ಷಣೆಗಾಗಿ ನಡೆದ ಫೈರಿಂಗ್ ಆಗಿದ್ದರೆ, ಇಷ್ಟು ಹತ್ತಿರದಿಂದ, ಎರಡು ಬೇರೆ ಬೇರೆ ಕೋನಗಳಲ್ಲಿ ಗುಂಡು ಹೊಡೆಯಲು ಹೇಗೆ ಸಾಧ್ಯ?” ಎಂದು ವೈದ್ಯರು ಪ್ರಶ್ನಿಸಿದ್ದಾರೆ.
-
ಬಟ್ಟೆ ಸುಟ್ಟಿರುವ, ಮಸಿ ಅಂಟಿರುವ ಸಾಕ್ಷ್ಯ: ಆಂಥೋನಿಯ ಬಲ ಎದೆಗೆ ಗುಂಡು ಬಿದ್ದಿದ್ದು, ಸುತ್ತಲೂ 50ಕ್ಕೂ ಹೆಚ್ಚು ಸಣ್ಣ ಸಣ್ಣ ಛರ್ರೆಗಳು (Pellets) ಹೊಕ್ಕಿವೆ. ಶಾಟ್ಗನ್ನಿಂದ ಗುಂಡು ಹಾರಿಸಿದಾಗ, ಬಂದೂಕಿನ ನಳಿಕೆಯಿಂದ ಬೆಂಕಿ ಮತ್ತು ಮಸಿ ಹೊರಬರುತ್ತದೆ. ಆಂಥೋನಿ ಧರಿಸಿದ್ದ ಕೆಂಪು ಟಿ-ಶರ್ಟ್ ಗುಂಡೇಟಿನ ಜಾಗದಲ್ಲಿ ಸುಟ್ಟು ಕರಕಲಾಗಿದೆ. 30 ಸೆಂಟಿಮೀಟರ್ಗಿಂತ (1 ಅಡಿ) ಕಡಿಮೆ ಅಂತರದಲ್ಲಿ ಶೂಟ್ ಮಾಡಿದರೆ ಮಾತ್ರ ದೇಹದ ಕೂದಲುಗಳು ಮತ್ತು ಬಟ್ಟೆ ಹೀಗೆ ಸುಟ್ಟುಹೋಗಲು ಸಾಧ್ಯ ಎಂದು ಫೋರೆನ್ಸಿಕ್ ತಜ್ಞರು ಸ್ಪಷ್ಟಪಡಿಸಿದ್ದಾರೆ.
-
ದೇಹದೊಳಗೆ ಸಿಕ್ಕ ‘ಪ್ಲಾಸ್ಟಿಕ್ ವಾಡ್’: ಶಾಟ್ಗನ್ ಕಾಡತೂಸಿನೊಳಗೆ ಮದ್ದು ಮತ್ತು ಛರ್ರೆಗಳನ್ನು ಪ್ರತ್ಯೇಕಿಸುವ ಕೆಂಪು ಬಣ್ಣದ ‘ಪ್ಲಾಸ್ಟಿಕ್ ವಾಡ್’ ಇರುತ್ತದೆ. ಗುಂಡು ಹಾರಿಸಿದಾಗ ಈ ಪ್ಲಾಸ್ಟಿಕ್ ತುಣುಕು ಹೆಚ್ಚು ದೂರ ಕ್ರಮಿಸುವುದಿಲ್ಲ. ಆದರೆ ಮೃತರ ಗಾಯಗಳ ಆಳದಲ್ಲಿ ಈ ಪ್ಲಾಸ್ಟಿಕ್ ವಾಡ್ಗಳು ಪತ್ತೆಯಾಗಿವೆ. ಅಂದರೆ ಗರಿಷ್ಠ 60 ಸೆಂಟಿಮೀಟರ್ (2 ಅಡಿ) ಒಳಗಿನಿಂದಷ್ಟೇ ಈ ಗುಂಡುಗಳನ್ನು ಹಾರಿಸಲಾಗಿದೆ ಎಂಬುದು ವೈದ್ಯಕೀಯವಾಗಿ ಸಾಬೀತಾಗಿದೆ.
ಒಂದೇ ಬಂದೂಕಿನಿಂದ ಇಷ್ಟೆಲ್ಲಾ ಗುಂಡು ಹಾರಿಸಲು ಸಾಧ್ಯವೇ?
ಆಗಸ್ಟ್ 17ರಂದು ವಿಧಾನಸಭೆಯಲ್ಲಿ ಮಾತನಾಡಿದ್ದ ಸಚಿವ ರಾಮಲಿಂಗಾರೆಡ್ಡಿ, “ಶಿವರಾಜ್.ಎಸ್ ಎಂಬ ಅರಣ್ಯ ರಕ್ಷಕನಿಗೆ ನೀಡಲಾಗಿದ್ದ R72035 ಸೀರಿಯಲ್ ನಂಬರ್ನ ಒಂದೇ ಒಂದು ಬಂದೂಕಿನಿಂದ ಮಾತ್ರ ಫೈರಿಂಗ್ ಆಗಿದೆ,” ಎಂದಿದ್ದರು.
ಆದರೆ ವೈದ್ಯರು ಇದನ್ನು ತಳ್ಳಿಹಾಕಿದ್ದಾರೆ. “ಶಾಟ್ಗನ್ಗಳು ಸಾಮಾನ್ಯ ಬಂದೂಕುಗಳಂತಲ್ಲ. ಒಮ್ಮೆ ಶೂಟ್ ಮಾಡಿದ ಬಳಿಕ, ಮತ್ತೊಮ್ಮೆ ಕಾಡತೂಸು (Cartridge) ಲೋಡ್ ಮಾಡಿಕೊಳ್ಳಲು ಸಮಯ ಬೇಕಾಗುತ್ತದೆ. ಇಲ್ಲಿ ಮೂವರ ಮೇಲೆ ಕನಿಷ್ಠ 4 ಗುಂಡುಗಳನ್ನು ಹಾರಿಸಲಾಗಿದೆ. ಸ್ವರಕ್ಷಣೆಯ ಆತುರದ ಸನ್ನಿವೇಶದಲ್ಲಿ ಒಂದೇ ಬಂದೂಕಿನಲ್ಲಿ ಇಷ್ಟು ಬಾರಿ ಲೋಡ್ ಮಾಡಿ ಶೂಟ್ ಮಾಡಲು ಅಸಾಧ್ಯ. ಒಂದಕ್ಕಿಂತ ಹೆಚ್ಚು ಬಂದೂಕುಗಳು ಬಳಕೆಯಾಗಿರಲೇಬೇಕು. ಈ ಎಲ್ಲಾ ಸಾಕ್ಷ್ಯಗಳು ಇದು ಸ್ವರಕ್ಷಣೆ ಅಲ್ಲ ಎಂಬುದನ್ನೇ ಸಾರುತ್ತಿವೆ,” ಎಂದು ಫೋರೆನ್ಸಿಕ್ ತಜ್ಞರು ವಿವರಿಸಿದ್ದಾರೆ.
ಒಟ್ಟಿನಲ್ಲಿ ಶಂಕಿತ ಬೇಟೆಗಾರರ ಎದೆ, ಕುತ್ತಿಗೆಗೆ ಅತೀ ಸನಿಹದಿಂದ ಗುಂಡಿಕ್ಕಿ ಕೊಂದು, ಆ ನಂತರ ‘ಸ್ವರಕ್ಷಣೆ’ಯ ಕಥೆ ಕಟ್ಟಲಾಗಿದೆಯೇ ಎಂಬ ಬಲವಾದ ಅನುಮಾನ ಇದೀಗ ಹುಟ್ಟಿಕೊಂಡಿದ್ದು, ಸಿಐಡಿ ತನಿಖೆಯ ಪೂರ್ಣ ವರದಿ ಬಂದ ಮೇಲಷ್ಟೇ ಅರಣ್ಯದಲ್ಲಿ ಆ ಕರಾಳ ರಾತ್ರಿ ನಡೆದ ನೈಜ ಘಟನೆ ಜಗಜ್ಜಾಹೀರಾಗಬೇಕಿದೆ.
