ಜಗತ್ತಿನ ಟ್ರಾಫಿಕ್​ ದಟ್ಟಣೆಯಲ್ಲಿ ಬೆಂಗಳೂರಿಗೆ ಎರಡನೇ ಸ್ಥಾನ

ಐಟಿ ಮೂಲಕ ವಿಶ್ವದ ಗಮನ ಸೆಳೆದಿದ್ದ ಬೆಂಗಳೂರು ನಗರ ಇತ್ತೀಚಿಗೆ ಟ್ರಾಫಿಕ್​ ಸಮಸ್ಯೆಯಿಂದಲೂ ಜಾಗತಿಕ ಸ್ಥಾನ ಪಡೆಯುತ್ತಿದೆ. ಜಗತ್ತಿನ ಅತಿ ದಟ್ಟಣೆಯ ಟ್ರಾಫಿಕ್​ನಲ್ಲಿ ಬೆಂಗಳೂರು ಎರಡನೇ ಸ್ಥಾನವನ್ನು ಪಡೆದಿದೆ ಎಂದು ಟಾಮ್ ಟಾಮ್ ಟ್ರಾಫಿಕ್ ಇಂಡೆಕ್ಸ್ 2025ರಲ್ಲಿ ತೋರಿಸಿದೆ. ಈ ಸೂಚ್ಯಂಕದಲ್ಲಿ 2023 ರಲ್ಲಿ 6ನೇ ಸ್ಥಾನದಲ್ಲಿದ್ದ ಬೆಂಗಳೂರು 2024ರಲ್ಲಿ 3ನೇ ಸ್ಥಾನ ಮತ್ತು 2025ರಲ್ಲಿ ಎರಡನೇ ಸ್ಥಾನ ಪಡೆದಿದ್ದು, ಜನದಟ್ಟಣೆಯ ಸಮಯದಲ್ಲಿ ಪ್ರಯಾಣದ ವೇಗ ಕಡಿಮೆಯಾಗಿದ್ದು, ಹೆಚ್ಚಿನ ಸಮಯವನ್ನು ಬೇಡುತ್ತಿದೆ ಎಂದು ವರದಿಯಲ್ಲಿ ತಿಳಿಸಲಾಗಿದೆ.

ಟಾಮ್‌ಟಾಮ್ ನೆದರ್‌ಲ್ಯಾಂಡ್ಸ್ ಮೂಲದ ಸಂಸ್ಥೆಯಾಗಿದ್ದು ಜಗತ್ತಿನಾದ್ಯಂತ ನಗರಗಳಲ್ಲಿ ದಟ್ಟಣೆಯ ಮಟ್ಟಗಳು ಮತ್ತು ಪ್ರಯಾಣದ ಸಮಯವನ್ನು ಹೋಲಿಕೆ ಮಾಡಿ ಪ್ರತಿವರ್ಷ ಟ್ರಾಫಿಕ್​ ಸೂಚ್ಯಂಕವನ್ನು ಪ್ರಕಟಿಸುತ್ತದೆ

ಹೆಚ್ಚಿನ ದಟ್ಟಣೆ ಸಮಯ: ಸಿಲಿಕಾನ್​ ಸಿಟಿಯಲ್ಲಿ ಪೀಕ್​ ಸಮಯದಲ್ಲಿದಲ್ಲಿ ನಿಧಾನಗತಿಯ ಟ್ರಾಫಿಕ್​ ಇದ್ದು, ಸರಾಸರಿ ಶೇ 74.4ರಷ್ಟಿದೆ. 2024ಕ್ಕೆ ಹೋಲಿಕೆ ಮಾಡಿದರೆ ಇದು ಶೇ 1.7ರಷ್ಟು ಹೆಚ್ಚಾಗಿದೆ. ಅಂದರೆ, ನಗರದಲ್ಲಿ 10 ಕಿ.ಮೀ ದೂರು ಕ್ರಮಿಸಲು ಪಡೆಯುವ ಸರಾಸರಿ ಸಮಯ 36 ನಿಮಿಷದ 9 ಸೆಕೆಂಡ್​ಗಳಾಗಿವೆ. ಹಿಂದಿನ ವರ್ಷಕ್ಕೆ ಹೋಲಿಕೆ ಮಾಡಿದರೆ ಇದು 2 ನಿಮಿಷದ 4 ಸೆಕೆಂಡ್​ಗಳಷ್ಟು ಹೆಚ್ಚಾಗಿರುವುದನ್ನು ತೋರಿಸುತ್ತದೆ.

ಬೆಂಗಳೂರು ಮಾತ್ರವಲ್ಲದೇ, ಲಂಡನ್ ನಲ್ಲಿಯೂ ಈ ದಟ್ಟಣೆಯ ಸಮಯ ಹೆಚ್ಚುತ್ತಿದೆ ಎಂಬುದು ಈ ವರದಿಯಲ್ಲಿ ಬಯಲಾಗಿದೆ. ಈ ಸೂಚ್ಯಂಕದಲ್ಲಿ ಐರ್ಲೆಂಡ್​ನ ಡಬ್ಲಿನ್, ಮೆಕ್ಸಿಕೋ ನಗರ, ಸ್ಪೇನ್​ನ ಬಾರ್ಸಿಲೋನಾ, ಗ್ರೀಸ್​ನ ಅಥೆನ್ಸ್​, ಇಟಲಿಯ ಮಿಲನ್​, ಅರ್ಜೆಂಟಿನಾದ ರೊಸಾರಿಯೊ, ಜಪಾನ್​ನ ಹಿರೋಷಿಮಾ, ಯುಎಸ್​ಎಯ ಸ್ಯಾನ್​​ ಫ್ರಾನ್ಸಿಸ್ಕೋ ಸೇರಿದಂತೆ ಹಲವು ನಗರಗಳು ಪಟ್ಟಿಯಲ್ಲಿ ಸೇರಿವೆ.