ಕಲಿಯುಗದ ಕಾಮಧೇನು, ಭಕ್ತರ ಇಷ್ಟಾರ್ಥಗಳನ್ನು ಈಡೇರಿಸುವ ಶ್ರೀ ಗುರು ರಾಘವೇಂದ್ರ ಸ್ವಾಮಿಗಳ 355ನೇ ಆರಾಧನಾ ಮಹೋತ್ಸವಕ್ಕೆ ಮಂತ್ರಾಲಯದಲ್ಲಿ ಅದ್ಧೂರಿ ಚಾಲನೆ ಸಿಕ್ಕಿದೆ. ಪೂರ್ವಾರಾಧನೆ ಹಿನ್ನೆಲೆಯಲ್ಲಿ ಮಠದ ಆವರಣದಲ್ಲಿ ಭಕ್ತಿಭಾವದ ವಾತಾವರಣ ನಿರ್ಮಾಣವಾಗಿದ್ದು, ದೇಶದ ಮೂಲೆ ಮೂಲೆಗಳಿಂದ ಭಕ್ತ ಸಾಗರವೇ ಹರಿದುಬರುತ್ತಿದೆ.
ಸೆಪ್ಟೆಂಬರ್ 2ರವರೆಗೆ ಒಟ್ಟು ಏಳು ದಿನಗಳ ಕಾಲ ಮಂತ್ರಾಲಯದಲ್ಲಿ ‘ಸಪ್ತರಾತ್ರೋತ್ಸವ’ ನಡೆಯಲಿದೆ. ರಾಯರ ದರ್ಶನ ಪಡೆಯಲು ಆಗಮಿಸುತ್ತಿರುವ ಲಕ್ಷಾಂತರ ಭಕ್ತರಿಗೆ ಶ್ರೀಮಠದಿಂದ ಸಕಲ ಸೌಕರ್ಯಗಳನ್ನು ಒದಗಿಸಲಾಗಿದೆ.
ರಾಯರಿಗೆ ತಿರುಪತಿಯ ಶೇಷ ವಸ್ತ್ರ ಸಮರ್ಪಣೆ ಈ ಬಾರಿಯ ಆರಾಧನಾ ಮಹೋತ್ಸವದ ವಿಶೇಷತೆಯೆಂದರೆ, ತಿರುಪತಿ ತಿರುಮಲ ದೇವಾಲಯದಿಂದ ಶ್ರೀನಿವಾಸ ದೇವರಿಗೆ ಉಡಿಸಿದ್ದ ‘ಶೇಷ ವಸ್ತ್ರ’ವನ್ನು ಮಂತ್ರಾಲಯಕ್ಕೆ ತರಿಸಿ, ರಾಯರ ಮೂಲ ಬೃಂದಾವನಕ್ಕೆ ಭಕ್ತಿ-ಶ್ರದ್ಧೆಗಳಿಂದ ಸಮರ್ಪಣೆ ಮಾಡಲಾಗಿದೆ. ಇದರ ಜೊತೆಗೆ ತಮಿಳುನಾಡಿನ ಪ್ರಸಿದ್ಧ ಶ್ರೀರಂಗ ಕ್ಷೇತ್ರದ ರಂಗನಾಥ ದೇವಸ್ಥಾನದಿಂದಲೂ ಪ್ರತಿವರ್ಷದಂತೆ ಈ ವರ್ಷವೂ ವಸ್ತ್ರ ಪ್ರಸಾದ ಆಗಮಿಸಿದ್ದು, ದೇವಸ್ಥಾನದ ಪ್ರಧಾನ ಅರ್ಚಕರು ಸ್ವತಃ ತಂದು ಸಮರ್ಪಿಸಿದ್ದಾರೆ.
ಯಾವಾಗ, ಯಾವ ಆರಾಧನೆ?
-
ಇಂದು (ಆ. 29): ಪೂರ್ವಾರಾಧನೆ
-
ನಾಳೆ (ಆ. 30): ಅತ್ಯಂತ ಮಹತ್ವದ ಮಧ್ಯಾರಾಧನೆ
-
ಆಗಸ್ಟ್ 31: ಉತ್ತರಾರಾಧನೆ
ಪ್ರತಿದಿನ ಬೆಳಗಿನ ಜಾವದಿಂದಲೇ ನಿರ್ಮಾಲ್ಯ ವಿಸರ್ಜನೆ, ಪಂಚಾಮೃತ ಅಭಿಷೇಕ, ಪಾದಪೂಜೆ ಹಾಗೂ ಭಕ್ತರಿಂದ ಸ್ತೋತ್ರ ಪಾರಾಯಣ, ಭಜನೆಗಳು ನಡೆಯುತ್ತಿವೆ. ಮಠದ ಆವರಣದಲ್ಲಿರುವ ‘ಪರಿಮಳ ತೀರ್ಥ’ ಪುಷ್ಕರಣಿಯಲ್ಲಿ ನಡೆಯುವ ತೆಪ್ಪೋತ್ಸವ ಭಕ್ತರ ಕಣ್ಮನ ಸೆಳೆಯುತ್ತಿದೆ.
ರಾಘವೇಂದ್ರ ಅನುಗ್ರಹ ಪ್ರಶಸ್ತಿ ಪ್ರದಾನ ಸಂಜೆ ಯೋಗೇಂದ್ರ ಸಭಾ ಮಂಟಪದಲ್ಲಿ ಶ್ರೀಮಠದ ಪ್ರತಿಷ್ಠಿತ ‘ರಾಘವೇಂದ್ರ ಅನುಗ್ರಹ ಪ್ರಶಸ್ತಿ’ ಪ್ರದಾನ ಸಮಾರಂಭ ಆಯೋಜಿಸಲಾಗಿದೆ. ಶೈಕ್ಷಣಿಕ ಮತ್ತು ಸಾಮಾಜಿಕ ಕ್ಷೇತ್ರದಲ್ಲಿ ಅನನ್ಯ ಸೇವೆ ಸಲ್ಲಿಸಿದ ತಮಿಳುನಾಡಿನ ತಂಜಾವೂರಿನ ಶಾಸ್ತ್ರ (SASTRA) ವಿಶ್ವವಿದ್ಯಾಲಯದ ಮುಖ್ಯಸ್ಥರಾದ ವೈದ್ಯ ಸುಬ್ರಹ್ಮಣ್ಯಂ ಹಾಗೂ ಓರ್ವ ಸಂಸ್ಕೃತ ವಿದ್ವಾಂಸರಿಗೆ ಈ ಬಾರಿಯ ಪ್ರಶಸ್ತಿ ನೀಡಿ ಗೌರವಿಸಲಾಗುತ್ತಿದೆ.
ಭಕ್ತರ ಹರ್ಷ ಮಂತ್ರಾಲಯದಲ್ಲಿ ಈ ಬಾರಿ ಮಾಡಿರುವ ದೀಪಾಲಂಕಾರ, ಭಕ್ತರಿಗೆ ಕಲ್ಪಿಸಿರುವ ಮೂಲಭೂತ ಸೌಕರ್ಯ ಹಾಗೂ ತ್ವರಿತ ದರ್ಶನದ ವ್ಯವಸ್ಥೆ ಬಗ್ಗೆ ಸಾರ್ವಜನಿಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. “ರಾಯರ ದರ್ಶನ ಸುಲಭವಾಗಿ ಸಿಕ್ಕಿತು, ಮಂತ್ರಾಕ್ಷತೆ ಪಡೆದು ಧನ್ಯರಾದೆವು” ಎಂದು ಆಗಮಿಸಿದ ಭಕ್ತರು ಸಂತಸ ಹಂಚಿಕೊಂಡಿದ್ದಾರೆ.
