ತುಮಕೂರು/ಬೆಂಗಳೂರು: ನೈಸ್ ಸಂಸ್ಥೆಯ ಅಶೋಕ್ ಖೇಣಿ ಅವರು ಶ್ರೀಮಠಕ್ಕೆ ಚಿನ್ನದ ಉಡುಗೊರೆ ನೀಡಿದ್ದರು ಎಂಬ ಹೇಳಿಕೆಯನ್ನು ಸಿದ್ದಗಂಗಾ ಮಠದ ಅಧ್ಯಕ್ಷರಾದ ಶ್ರೀ ಸಿದ್ದಲಿಂಗ ಮಹಾಸ್ವಾಮೀಜಿಗಳು ಸ್ಪಷ್ಟವಾಗಿ ತಳ್ಳಿಹಾಕಿದ್ದಾರೆ. ಖೇಣಿಯವರು ಕೇವಲ ತಮ್ಮ ಪ್ರಚಾರಕ್ಕಾಗಿ ಶ್ರೀಮಠದ ಹೆಸರನ್ನು ಬಳಸಿಕೊಂಡಿದ್ದು, ಅವರ ಹೇಳಿಕೆ ಸತ್ಯಕ್ಕೆ ದೂರವಾದದ್ದು ಎಂದು ಶ್ರೀಗಳು ಬಹಿರಂಗವಾಗಿ ಅಸಮಾಧಾನ ಹೊರಹಾಕಿದ್ದಾರೆ.
ಮಾಧ್ಯಮಗಳೊಂದಿಗೆ ಮಾತನಾಡಿದ ಸಿದ್ದಲಿಂಗ ಶ್ರೀಗಳು, “ಅಶೋಕ್ ಖೇಣಿಯವರು ಮಠಕ್ಕೆ ಚಿನ್ನ ಕೊಟ್ಟಿದ್ದಾರೆ ಎನ್ನುವುದರಲ್ಲಿ ಯಾವುದೇ ಹುರುಳಿಲ್ಲ. ಅವರ ಸಂಪರ್ಕವೇ ನಮಗಿಲ್ಲ. ಪರಮಪೂಜ್ಯರು (ಡಾ. ಶಿವಕುಮಾರ ಸ್ವಾಮೀಜಿ) ಲಿಂಗೈಕ್ಯರಾದಾಗಲೂ ಅವರು ಮಠಕ್ಕೆ ಬಂದಿರಲಿಲ್ಲ. ಕೇವಲ ತಮ್ಮ ಪ್ರಚಾರಕ್ಕಾಗಿ ಇಂತಹ ಉತ್ಪ್ರೇಕ್ಷೆಯ ಮಾತುಗಳನ್ನು ಆಡುತ್ತಿದ್ದಾರೆ. ಖೇಣಿಯವರು ಯಾವುದೇ ಚಿನ್ನದ ಉಡುಗೊರೆ ನೀಡಿರುವ ಬಗ್ಗೆ ನಮಗೆ ಮಾಹಿತಿಯೂ ಇಲ್ಲ, ಮಠದಲ್ಲಿ ಯಾವುದೇ ದಾಖಲೆಯೂ ಇಲ್ಲ. ಯಾರದ್ದೋ ವೈಯಕ್ತಿಕ ವ್ಯವಹಾರಕ್ಕಾಗಿ ಶ್ರೀಮಠದ ಬಗ್ಗೆ ಇಲ್ಲಸಲ್ಲದ ಹೇಳಿಕೆಗಳನ್ನು ನೀಡಿರುವುದು ನಮಗೆ ತೀವ್ರ ನೋವು ಮತ್ತು ಬೇಸರ ತರಿಸಿದೆ. ಈ ಕುರಿತು ಮಠದಿಂದ ಈಗಾಗಲೇ ಸ್ಪಷ್ಟೀಕರಣ ಪ್ರಕಟಣೆಯನ್ನೂ ಹೊರಡಿಸಲಾಗಿದೆ,” ಎಂದು ತಿಳಿಸಿದರು.
ಚಿನ್ನದ ಕಡಗ ನೀಡಿದ್ದು ಯಾರು?
ಪರಮಪೂಜ್ಯರು ಧರಿಸುತ್ತಿದ್ದ ಚಿನ್ನದ ಕಡಗದ ಹಿಂದಿನ ನೈಜ ಸಂಗತಿಯನ್ನು ವಿವರಿಸಿದ ಶ್ರೀಗಳು, “ಬಹಳ ವರ್ಷಗಳ ಹಿಂದೆ ಮಠದ ಭಕ್ತರಾದ, ಸ್ವಾತಿ ಪೆಟ್ರೋಲ್ ಬಂಕ್ ಮಾಲೀಕ ಹುಲಿಕುಂಟೆ ಸೋಮಣ್ಣ ಅವರು ಪೂಜ್ಯರಿಗೆ ಚಿನ್ನದ ಕಡಗ ನೀಡಲು ಮುಂದಾಗಿದ್ದರು. ಆಗ ಪೂಜ್ಯರು ‘ನನಗೆ ಅದೆಲ್ಲ ಬೇಡಪ್ಪ, ಆ ಹಣದಲ್ಲಿ ಮಠದ ಮಕ್ಕಳಿಗೆ ಎರಡು ಕೊಠಡಿ (ರೂಮ್) ಕಟ್ಟಿಸಿಕೊಡಿ’ ಎಂದು ಹೇಳಿದ್ದರು. ಆದರೆ, ಅವರ ಕುಟುಂಬದವರು ತೀವ್ರ ಒತ್ತಾಯ ಮಾಡಿ, ಭಕ್ತಿಯಿಂದ ಆ ಚಿನ್ನದ ಕಡಗವನ್ನು ತೊಡಿಸಿದ್ದರು. ಕೊನೆಯವರೆಗೂ ಪೂಜ್ಯರು ಅದೇ ಕಡಗವನ್ನು ಧರಿಸಿದ್ದರು. ಆ ಕಡಗ ಈಗಲೂ ಮಠದಲ್ಲಿ ಭದ್ರವಾಗಿದೆ. ಇದನ್ನು ಬಿಟ್ಟರೆ ಖೇಣಿಯವರು ಹೇಳುತ್ತಿರುವುದು ಶುದ್ಧ ಸುಳ್ಳು,” ಎಂದು ಸ್ಪಷ್ಟಪಡಿಸಿದರು.
ಡಿ.ಕೆ. ಶಿವಕುಮಾರ್ ಭೇಟಿ ಹಿಂದಿನ ಕಾರಣ ಬಿಚ್ಚಿಟ್ಟ ಶ್ರೀಗಳು
ಇದೇ ವೇಳೆ ಡಿಸಿಎಂ ಡಿ.ಕೆ. ಶಿವಕುಮಾರ್ ಅವರನ್ನು ಭೇಟಿಯಾಗಿದ್ದರ ಕುರಿತೂ ಶ್ರೀಗಳು ಮಾಹಿತಿ ನೀಡಿದರು. “ಸೋಂಪುರ ಭಾಗದಲ್ಲಿ ಟೋಲ್ ಹಾಗೂ ರಸ್ತೆ ಸಮಸ್ಯೆಯಿಂದ ರೈತರಿಗೆ ತೊಂದರೆಯಾಗುತ್ತಿತ್ತು. ಈ ಬಗ್ಗೆ ರೈತರು ಬಹಳಷ್ಟು ಒತ್ತಾಯ ಮಾಡುತ್ತಿದ್ದರಿಂದ, ಅವರ ಪರವಾಗಿ ನಾವು ಅನಿವಾರ್ಯವಾಗಿ ಸಿಎಂ ಹಾಗೂ ಡಿಸಿಎಂ ಅವರನ್ನು ಭೇಟಿಯಾಗಬೇಕಾಯಿತು. ನಾವು ಭೇಟಿಯಾದಾಗ ಡಿ.ಕೆ. ಶಿವಕುಮಾರ್ ಅವರು, ‘ನೀವು ಅರ್ಜಿ ಹಿಡಿದುಕೊಂಡು ಬರಬೇಡಿ, ಕೇವಲ ಆಶೀರ್ವಾದ ಮಾಡಿ ಸಾಕು. ಕರೆದಿದ್ದರೆ ನಾನೇ ಬರುತ್ತಿದ್ದೆ’ ಎಂದು ಅತ್ಯಂತ ಸಂಸ್ಕಾರಯುತವಾಗಿ ಮಾತನಾಡಿದರು. ಆದರೆ ರೈತರ ಕೆಲಸ ಆಗಬೇಕಿದ್ದರಿಂದ ಮತ್ತು ಮಧ್ಯವರ್ತಿಗಳ ಮೂಲಕ ಹೇಳಿಸುವ ಬದಲು ನಾವೇ ನೇರವಾಗಿ ಹೋಗಿ ಸಮಸ್ಯೆ ವಿವರಿಸುವುದು ಸೂಕ್ತ ಎಂಬ ಕಾರಣಕ್ಕೆ ನಾವೇ ತೆರಳಿ ಮನವಿ ಮಾಡಿದ್ದೆವು,” ಎಂದು ಸಿದ್ದಲಿಂಗ ಶ್ರೀಗಳು ವಿವರಣೆ ನೀಡಿದರು.
