ಬೆಂಗಳೂರು (ಸಂಭ್ರಮ ಪ್ರಭ ವಾರ್ತೆ): ರಾಜ್ಯದ ಜನತೆಗೆ ನಂದಿನಿ ಹಾಲು ಮತ್ತು ಮೊಸರಿನ ದರ ಏರಿಕೆಯ ಬಿಸಿ ತಟ್ಟಿದ ಬೆನ್ನಲ್ಲೇ, ಕರ್ನಾಟಕ ಹಾಲು ಮಹಾಮಂಡಳಿ (KMF) ಮತ್ತೊಂದು ದರ ಏರಿಕೆಯ ಬರೆ ಎಳೆದಿದೆ. ನವೆಂಬರ್ 4ರಿಂದಲೇ ಜಾರಿಗೆ ಬರುವಂತೆ ನಂದಿನಿ ತುಪ್ಪ, ಬೆಣ್ಣೆ ಹಾಗೂ ಪನೀರ್ ಬೆಲೆಗಳನ್ನು ಭಾರಿ ಪ್ರಮಾಣದಲ್ಲಿ ಪರಿಷ್ಕರಿಸಲಾಗಿದೆ. ದೀಪಾವಳಿ ಹಬ್ಬ ಮುಗಿದ ಬೆನ್ನಲ್ಲೇ ಜಾರಿಯಾಗಿರುವ ಈ ದರ ಏರಿಕೆಯಿಂದ ಗೃಹಿಣಿಯರು, ಬೇಕರಿ ಹಾಗೂ ಹೋಟೆಲ್ ಉದ್ಯಮಿಗಳ ಜೇಬಿಗೆ ಕತ್ತರಿ ಬಿದ್ದಿದೆ.
ಹೊಸ ಪರಿಷ್ಕರಣೆಯಂತೆ ನಂದಿನಿ ತುಪ್ಪದ ಬೆಲೆ ಪ್ರತಿ ಲೀಟರ್‌ಗೆ 135 ರೂಪಾಯಿಗಳಷ್ಟು ಹೆಚ್ಚಳವಾಗಿದೆ. ಬೆಣ್ಣೆ ಹಾಗೂ ಪನೀರ್ ದರಗಳಲ್ಲೂ ಗಣನೀಯ ಏರಿಕೆ ಕಂಡುಬಂದಿದ್ದು, ತೃಪ್ತಿ ಹಾಲಿನ ದರವನ್ನೂ ಪರಿಷ್ಕರಿಸಲಾಗಿದೆ.
ಪರಿಷ್ಕೃತ ದರ ಪಟ್ಟಿ ವಿವರ:
ನವೆಂಬರ್ 1ರಂದು ಹಾಲಿನ ದರವನ್ನು ಪ್ರತಿ ಲೀಟರ್‌ಗೆ 8 ರೂಪಾಯಿ ಹಾಗೂ ಮೊಸರಿನ ದರವನ್ನು 14 ರೂಪಾಯಿಗಳಷ್ಟು ಹೆಚ್ಚಿಸಲಾಗಿತ್ತು. ಇದೀಗ ಉಪ ಉತ್ಪನ್ನಗಳಾದ ತುಪ್ಪ, ಬೆಣ್ಣೆ ಮತ್ತು ಪನೀರ್ ದರವೂ ಏರಿಕೆಯಾಗಿರುವುದು ಸಿಹಿ ತಿಂಡಿ ತಯಾರಕರು ಮತ್ತು ಹೋಟೆಲ್ ಉದ್ಯಮದ ಮೇಲೆ ನೇರ ಪರಿಣಾಮ ಬೀರಲಿದೆ.
| ಉತ್ಪನ್ನ | ಪ್ರಮಾಣ | ಹಳೆಯ ದರ | ಹೊಸ ದರ |
|---|---|---|---|
| ನಂದಿನಿ ತುಪ್ಪ (ಸ್ಯಾಚೆಟ್) | 1 ಲೀಟರ್ | ₹715 | ₹850 |
| ನಂದಿನಿ ತುಪ್ಪ (ಪೆಟ್ ಜಾರ್) | 1 ಲೀಟರ್ | ₹735 | ₹870 |
| ನಂದಿನಿ ತುಪ್ಪ (ಸ್ಯಾಚೆಟ್) | 500 ಮಿ.ಲೀ | ₹358 | ₹425 |
| ನಂದಿನಿ ತುಪ್ಪ (ಸ್ಯಾಚೆಟ್) | 200 ಮಿ.ಲೀ | – | ₹95 |
| ನಂದಿನಿ ತುಪ್ಪ (ಟಿನ್) | 15 ಕೆ.ಜಿ | ₹11,625 | ₹14,100 |
| ಉಪ್ಪಿಲ್ಲದ ಬೆಣ್ಣೆ | 500 ಗ್ರಾಂ | ₹285 | ₹390 |
| ಉಪ್ಪಿಲ್ಲದ ಬೆಣ್ಣೆ | 200 ಗ್ರಾಂ | ₹135 | ₹160 |
| ಉಪ್ಪು ಸಹಿತ ಬೆಣ್ಣೆ | 500 ಗ್ರಾಂ | ₹310 | ₹380 |
| ಉಪ್ಪು ಸಹಿತ ಬೆಣ್ಣೆ | 100 ಗ್ರಾಂ | ₹70 | ₹90 |
| ನಂದಿನಿ ಪನೀರ್ | 1 ಕೆ.ಜಿ | ₹408 | ₹485 |
| ನಂದಿನಿ ಪನೀರ್ | 500 ಗ್ರಾಂ | – | ₹260 |
| ನಂದಿನಿ ಪನೀರ್ | 200 ಗ್ರಾಂ | ₹96 | ₹115 |
| ಮೀಡಿಯಂ ಫ್ಯಾಟ್ ಪನೀರ್ | 200 ಗ್ರಾಂ | – | ₹110 |
| ತೃಪ್ತಿ ಹಾಲು | 135 ಮಿ.ಲೀ | – | ₹11 |
| ತೃಪ್ತಿ ಹಾಲು | 450 ಮಿ.ಲೀ | – | ₹33 |
