ಅಂಚೆ ಇಲಾಖೆಯ ಪಾರ್ಸೆಲ್‌ ಆನ್‌ ವ್ಹೀಲ್ಸ್‌ ಯೋಜನೆಗೆ ಭರ್ಜರಿ ಸ್ಪಂದನೆ: ಇತರೆಡೆಗೂ ವಿಸ್ತರಿಸಲು ಮುಂದಾದ ಇಲಾಖೆ

ವರದಿ: ಪ್ರಿಯಲಚ್ಛಿ ಗಂಧನಹಳ್ಳಿ

ಬೆಂಗಳೂರು: ನಗರದ ಪಶ್ಚಿಮ ಅಂಚೆ ಇಲಾಖೆ ವಿಭಾಗ ಪ್ರಾಯೋಗಿಕವಾಗಿ ಆರಂಭಿಸಿದ ಪಾರ್ಸೆಲ್‌ ಆನ್‌ ವ್ಹೀಲ್ಸ್‌ ಯೋಜನೆಗೆ ಭರ್ಜರಿ ಸ್ಪಂದನೆ ಸಿಕ್ಕ ಹಿನ್ನೆಲೆಯಲ್ಲಿ ನಗರದಲ್ಲಿ ಉಳಿದ ಮೂರು ವಿಭಾಗಗಳಲ್ಲಿ ವಿಸ್ತರಣೆ ಮಾಡಲು ಮುಂದಾಗಿದೆ.

ಜೂನ್​ 6ರಂದು ಪೀಣ್ಯ ಹಾಗೂ ಅಬ್ಬಿಗೆರೆ ಇಂಡಸ್ಟ್ರಿಯಲ್‌ ಪ್ರದೇಶದಲ್ಲಿ ಆರಂಭಿಸಿದ್ದ ಬಾಗಿಲಿಗೆ ಬಂದು ಸರಕು ಒಯ್ಯುವ ವಾಹನಗಳ ಸೇವೆಗೆ ಗ್ರಾಹಕರಿಂದ ಉತ್ತಮ ಸ್ಪಂದನೆ ಸಿಕ್ಕಿದೆ.

ಅದರಲ್ಲೂ ಕೈಗಾರಿಕೆಗಳು ತಮ್ಮ ಸರಕುಗಳನ್ನು ಸಾಗಿಸಲು ಹೆಚ್ಚಾಗಿ ಅಂಚೆ ಇಲಾಖೆಯ ವಾಹನವನ್ನು ಬಳಕೆ ಮಾಡಿವೆ. ರಾಜ್ಯದ ನಾನಾ ಕಡೆ ಸೇರಿ ಹೊರ ರಾಜ್ಯಗಳಿಗೂ ಸರಕು ಸಾಗಣೆಯಾಗಿದೆ. ವಾರಾಂತ್ಯ ಹೊರತುಪಡಿಸಿ ಉಳಿದ ದಿನಗಳಲ್ಲಿ ಹೆಚ್ಚಿನ ಪಾರ್ಸೆಲ್‌ಗಳು ಅಂಚೆ ವಾಹನದಲ್ಲಿ ಹೋಗಿವೆ. ಬುಧವಾರ ಒಂದೇ ದಿನ ಕೈಗಾರಿಕೆಯೊಂದರ 675ಕ್ಕೂ ಹೆಚ್ಚಿನ ಸರಕುಗಳನ್ನು ಅಂಚೆ ವಾಹನ ಸಾಗಿಸಿದೆ. ಪ್ರಾಯೋಗಿಕ ಸೇವೆಯಲ್ಲೇ 989 ಸರಕು ಸಾಗಿಸಿದ್ದು, 85 ಸಾವಿರಕ್ಕೂ ಹೆಚ್ಚಿನ ಆದಾಯ ಬಂದಿದೆ, ಹೀಗಾಗಿ ಯೋಜನೆಯನ್ನು ಇತರೆ ವಿಭಾಗಗಳಲ್ಲೂ ವಿಸ್ತರಿಸಿ ಪೂರ್ಣ ಪ್ರಮಾಣದಲ್ಲಿ ಆರಂಭಿಸಲು ಅಂಚೆ ಇಲಾಖೆ ಮುಂದಾಗಿದೆ.

ಎಂ.ಜಿ. ರಸ್ತೆಯ ಮಣಿಪಾಲ್‌ ಸೆಂಟರ್‌ ಬಳಿ ಆರಂಭ: ಇದೀಗ ನಗರದ ಪಶ್ಚಿಮ ಭಾಗದಲ್ಲಿ ಅಂಚೆ ವಾಹನಗಳು ಮನೆ ಬಾಗಿಲಿಗೆ ಬಂದು ಪಾರ್ಸೆಲ್‌ ಒಯ್ಯುತ್ತಿವೆ. ಯೋಜನೆ ವಿಸ್ತರಣೆ ಭಾಗವಾಗಿ ಮುಂದಿನ ವಾರ ನಗರದ ಮಧ್ಯ ಭಾಗವಾದ ಎಂ.ಜಿ.ರಸ್ತೆಯ ಮಣಿಪಾಲ್‌ ಸೆಂಟರ್‌ ಬಳಿಯಲ್ಲಿ ಇನ್ನೊಂದು ವಾಹನವನ್ನು ರಸ್ತೆಗಿಳಿಸಲು ಅಂಚೆ ಇಲಾಖೆ ನಿರ್ಧರಿಸಿದೆ. ಬಳಿಕ ಹಂತ ಹಂತವಾಗಿ ಮುಂದಿನ ತಿಂಗಳಲ್ಲಿ ಪೂರ್ವ ಭಾಗ ಮಹಾದೇವಪುರ ಕೈಗಾರಿಕಾ ಏರಿಯಾ, ಹಾಗೂ ದಕ್ಷಿಣ ಬೆಂಗಳೂರಿನ ಬಿಕಾಸಿಪುರ ಕೈಗಾರಿಕಾ ಪ್ರದೇಶ ನಗರದಲ್ಲಿ ಪಾರ್ಸೆಲ್‌ ಆನ್‌ ವ್ಹೀಲ್ಸ್‌ ಜಾರಿಗೆ ಬರಲಿದೆ ಎಂದು ಅಂಚೆ ಇಲಾಖೆಯ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಮೊದಲ ದಿನವೇ 24 ಪಾರ್ಸೆಲ್‌ ಬುಕ್: 2023 ರ ಜೂ. 6 ರಂದು ಬೆಂಗಳೂರಿನ ನಗರದ ಅಬ್ಬಿಗೆರೆ ಕೈಗಾರಿಕಾ ಪ್ರದೇಶ ಹಾಗೂ ಪೀಣ್ಯ ಕೈಗಾರಿಕಾ ಪ್ರದೇಶಗಳಲ್ಲಿ ಪಾರ್ಸೆಲ್ ಮೊಬೈಲ್ ಸೇವೆ ಪ್ರಾರಂಭವಾಗಿತ್ತು. ಅಂಚೆ ಕಚೇರಿ ಸಿಬ್ಬಂದಿ ವ್ಯಾನ್ ನೊಂದಿಗೆ ಬಂದು ನಿಮ್ಮ ಪಾರ್ಸೆಲ್ ಕೊಂಡೊಯ್ಯುತ್ತಾರೆ. ಗ್ರಾಹಕರು ಅಂಚೆ ಇಲಾಖೆಗೆ ಹೋಗಬೇಕಾಗಿಲ್ಲ ಎನ್ನಲಾಗಿತ್ತು. ಈ ಯೋಜನೆಗೆ “ಪಾರ್ಸೆಲ್ ಬುಕಿಂಗ್ ಆನ್ ವೀಲ್ಸ್” ಟ್ಯಾಗ್ ಲೈನ್ ಕೊಡಲಾಗಿತ್ತು. ಮೊದಲ ದಿನವೇ 24 ಪಾರ್ಸೆಲ್‌ಗಳನ್ನು ಗ್ರಾಹಕರು ಬುಕ್ ಮಾಡಿದ್ದರು. ಮನೆ ಬಾಗಿಲಿಗೆ ತೆರಳಿ ಅಲ್ಲಿ ಪಾರ್ಸಲ್ ಪಡೆದು ಅಲ್ಲಿಯೇ ತೂಕ ಮಾಡಿ ಗ್ರಾಹಕರಿಗೆ ರಸೀದಿಯನ್ನು ಸಹ ನೀಡಲಾಗಿತ್ತು.

ಪಾರ್ಸೆಲ್ಗಳನ್ನು ಉಚಿತವಾಗಿ ತೆಗೆದುಕೊಂಡು ಮತ್ತು ಅಂಚೆ ಕಚೇರಿಗೆ ಕೊಂಡೊಯ್ಯಲಾಗಿ. ಅವುಗಳನ್ನು ವಿಳಾಸದ ಆಧಾರದಲ್ಲಿ ವಿಂಗಡಿಸಿ ಬಳಿಕ ಗ್ರಾಹಕರು ಪಾರ್ಸೆಲ್ ತಲುಪುವವರೆಗೂ ಟ್ರ್ಯಾಕ್ ಮಾಡಬಹುದು ಎಂದು ಅಂಚೆ ಇಲಾಖೆ ತಿಳಿಸಿತ್ತು.