ರಾಜಕಾರಣಿಗಳು ದೇಶ ವಿರೋಧಿಗಳ ಬಗ್ಗೆ ಮಾತನಾಡಿದ್ದಕ್ಕೆ 30 ಕೋಟಿ ರೂಪಾಯಿ ಕಳೆದುಕೊಂಡಿದ್ದೇನೆ; ಕಂಗನಾ ರನೌತ್‌
I lost 30 crore rupees because politicians talked about anti-nationals; Kangana Ranaut
ವರದಿ: ಪ್ರಿಯಲಚ್ಛಿ ಗಂಧನಹಳ್ಳಿ
ಬಾಲಿವುಡ್‌ ನಟಿ ಕಂಗನಾ ರನೌತ್‌ ಒಂದೆಡೆ ಕಾಂಟ್ರವರ್ಸಿ ಕ್ವೀನ್‌ ಎಂದು ಗುರುತಿಸಿಕೊಂಡಿದ್ದರೆ, ಮತ್ತೊಂದು ಕಡೆ ಡೇರ್‌ ಡೆವಿಲ್‌ ಎಂದೂ ಹೆಸರಾಗಿದ್ದಾರೆ. ಯಾರು ಏನೇ ಹೇಳಲಿ ತನಗೆ ಅನಿಸಿದ್ದನ್ನು ಥಟ್‌ ಎಂದು ಹೇಳುವ ವ್ಯಕ್ತಿತ್ವದಿಂದಾಗಿ ಕಂಗನಾ ಅನೇಕರ ವಿರೋಧ ಕಟ್ಟಿಕೊಂಡಿದ್ದಾರೆ.
ಒಬ್ಬ ಸ್ಟಾರ್‌ ನಟಿಯಾಗಿ ವಿವಾದಾತ್ಮಕ ಹೇಳಿಕೆ ಕೊಟ್ಟರೆ ಅದು ಸೂಕ್ತವಲ್ಲ ಎಂದು ಎಂದಿಗೂ ಕಂಗನಾ ಯೋಚನೆ ಮಾಡಿದವರಲ್ಲ. ಈ ರೀತಿ ಮಾತನಾಡಿ ಅವರು ಅನೇಕರ ವಿರೋಧ ಎದುರಿಸಿದ್ದಾರೆ, ಈಗಲೂ ಎದುರಿಸುತ್ತಿದ್ದಾರೆ. ಅದರಲ್ಲಿ ಬಾಲಿವುಡ್‌ ಮಂದಿ ಕೂಡಾ ಇದ್ದಾರೆ. ಬಾಲಿವುಡ್‌ನಲ್ಲಿ ಯಾರೂ ನನ್ನೊಂದಿಗೆ ಗೆಳೆತನ ಮಾಡಲು ಯೋಗ್ಯರಲ್ಲ ಎಂದು ಕಂಗನಾ ಹೇಳಿದ್ದು ಇದಕ್ಕೆ ಪ್ರಮುಖ ಕಾರಣ. ರಾಜಕಾರಣಿಗಳು, ದೇಶ ವಿರೋಧಿಗಳ ಬಗ್ಗೆ ಮಾತನಾಡುತ್ತಿರುವುದಕ್ಕೆ ಕಂಗನಾ ವರ್ಷಕ್ಕೆ ಸುಮಾರು 30 ಕೋಟಿ ರೂಪಾಯಿ ಹಣ ಕಳೆದುಕೊಂಡಿದ್ದಾರಂತೆ. ಹಾಗಂತ ಅವರೇ ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ಬರೆದುಕೊಂಡಿದ್ದಾರೆ.
ನನಗೆ ಏನು ಅನ್ನಿಸುತ್ತದೆ ಅದನ್ನೇ ನಾನು ಮಾತನಾಡುತ್ತೇನೆ. ಅದರಿಂದ ನಾನು ಹಣ ಕಳೆದುಕೊಳ್ಳುತ್ತೇನೆ ಎಂದರೆ, ಅದು ಹಾಗೇ ಇರಲಿ ಎಂದು ಟ್ವಿಟ್ಟರ್‌ ಮಾಲೀಕ ಎಲೋನ್‌ ಮಸ್ಕ್‌, ಒಮ್ಮೆ ಸಂದರ್ಶನದಲ್ಲಿ ಹೇಳಿದ್ದರು. ಆ ಸಂದರ್ಶನದ ಸ್ಕ್ರೀನ್‌ಶಾಟನ್ನು ತಮ್ಮ ಇನ್‌ಸ್ಟಾಗ್ರಾಮ್‌ ಸ್ಟೋರಿಯಲ್ಲಿ ಹಂಚಿಕೊಂಡಿರುವ ಕಂಗನಾ ರಣಾವತ್‌, ಹಿಂದೂ ವಿರೋಧಿ, ದೇಶವಿರೋಧಿಗಳ ಬಗ್ಗೆ ಮಾತನಾಡಿದ್ದಕ್ಕೆ ಅನೇಕ ಸಂಸ್ಥೆಗಳು ನನ್ನನ್ನು ಬ್ರಾಂಡ್‌ ಅಂಬಾಸಿಡರ್‌ ಸ್ಥಾನದಿಂದ ಕೈ ಬಿಟ್ಟವು. ಇದರಿಂದ ನನಗೆ 30-40 ಕೋಟಿ ರೂಪಾಯಿ ನಷ್ಟವಾಗಿದೆ ಎಂದು ಕಂಗನಾ ಹೇಳಿಕೊಂಡಿದ್ದಾರೆ.
ನಾನು ಸ್ವತಂತ್ರ್ಯಳು, ನನಗೆ ಬೇಕಾದ ಹಾಗೆ ಬದುಕುತ್ತೇನೆ, ಅನ್ನಿಸಿದ್ದನ್ನು ಹೇಳುತ್ತೇನೆ, ಭಾರತದ ಸಂಸ್ಕೃತಿ, ಸಮಗ್ರತೆಗೆ ಬೆಲೆ ಕೊಡದ ಕಾರ್ಪೊರೇಟ್‌ ಬ್ರಾಂಡ್‌ ಮುಖ್ಯಸ್ಥರು ಮುಖ್ಯವಲ್ಲ. ನಾನು ಎಲೋನ್‌ ಮಸ್ಕ್‌ನನ್ನು ಪ್ರಶಂಸಿಸುತ್ತೇನೆ. ಶ್ರೀಮಂತರು ಹಣದ ಬಗ್ಗೆ ಕಾಳಜಿ ವಹಿಸಬಾರದು ಎಂದು ಕಂಗನಾ ಬರೆದುಕೊಂಡಿದ್ದಾರೆ.
